Styrktaraðilar - fjáröflunarviðburðir

Börn með krabbamein eiga marga góða bakhjarla sem sumir hverjir styrkja félagið myndarlega á hverju ári, aðrir sjaldnar.

Flying Tiger  hefur styrkt félagið frá árinu 2021 með nokkrum söfnunartímabilum á ári hverju. Þá býðst viðskiptavinum að bæta ákveðinni fjárhæð,  einu sinni eða oftar, við kaup sín. Ofurhetjuvikur eru haldnar í verslunum og hluti andvirðis ákveðinna vara rennur reglulega til félagsins. Þá hefur fyrirtækið gefið börnum í félaginu glaðning á jólaballi og efni til listsköpunar. Afrakstur safnana FT nemur nokkrum milljónum króna á ári hverju.

Oddfellow-reglan á Íslandi hefur styrkt SKB myndarlega undanfarin ár. Langstærsta framlagið kom úr Styrktar- og líknarsjóði Oddfellow og stóð straum af endurbótum og viðgerðum á Hetjulundi, hvíldarheimili Barna með krabbamein á Ketilsstöðum í Landsveit. Þá hafa einstaka stúkur lagt félaginu til fé og styrkt það með vinnuframlagi en Oddfellowstúkan Sæmundur fróði tók aðstandendaíbúð félagsins á Lindargötu rækilega í gegn í árslok 2020. 

Nokkrir viðburðir hafa verið fastir liðir í fjáröflun félagsins, m.a. kótelettusala á bæjarhátíðinni Kótelettunni á Selfossi, sem haldin er í júní ár hvert og Reykjavíkurmaraþon þar sem fjölmargir hafa skráð sig til þátttöku og beðið um að áheit á sig rynnu til SKB.

Á hverju ári rekur ýmsa fjáröflunarviðburði á fjörur Barna með krabbamein sem skólahópar, félagasamtök, starfsmannahópar og einstaklingar standa fyrir og láta afraksturinn renna til félagsins. 

Í mörg ár hefur SKB verið með samning við Advania um myndarlegan styrk í formi tölvugjafa til barnanna í félaginu.

Fyrir þennan stuðning eru forsvarsmenn og aðrir félagsmenn afar þakklátir, enda gerir þetta allt Börnum með krabbamein kleift að standa vel við bakið á félagsmönnum sínum.