Karfan er tóm.
Lög og skipulagsskrá
Lög barna með krabbamein - styrktarfélags
1. gr.
Félagið heitir Börn með krabbamein - styrktarfélag.
2. gr.
Tilgangur félagsins er að gæta hagsmuna krabbameinssjúkra barna og aðstandenda þeirra á öllum sviðum, innan sjúkrahúsa og utan. Félagið styð við félagsmenn meðan á meðferð stendur, eftir að henni lýkur og meðan þeir glíma við síðbúnar afleiðingar. Félagsmenn, sem sjálfir hafa greinst með krabbamein á barnsaldri, geta sótt um fjárhagslegan stuðning til félagsins, skv. nánari reglum sem um það gilda, til 35 ára aldurs eða í 25 ár eftir greiningu/endurgreiningu – eftir því hvor tímamörkin nást síðar. Þessir sömu félagsmenn geta sótt um styrk til að bregðast við frjósemisvanda til 49 ára aldurs. Aðrir félagsmenn (foreldrar/forráðamenn og systkini) geta sótt um fjárhagslegan stuðning til félagsins, skv. nánari reglum sem um það gilda, í 20 ár eftir greiningu/endurgreiningu.
Engin tímamörk gilda um þátttöku félagsmanna í viðburðum og félagsstarfi á vegum félagsins.
Síðbúnar afleiðingar eru andlegir og líkamlegir kvillar, sem skv. læknismati eru raktir til krabbameins á barnsaldri.
3. gr.
Félagið skal standa að fjáröflunum og skal það fé sem safnast renna í sjóð félagsins. Reikningsár félagsins skal vera almanaksárið.
Félagsmenn, sem fengu krabbamein á barnsaldri, og glíma við frjósemisvanda vegna krabbameinsmeðferðar, geta sótt um styrk fyrir frjósemismeðferð og/eða eggnámi, allt að 1.000.000 króna. Skilyrði fyrir styrknum er að umsækjandi hafi tæmt rétt sinn annars staðar, hjá Sjúkratryggingum eða öðrum aðilum.
4. gr.
Félagsmenn eru börn sem greinst hafa með krabbamein, foreldrar þeirra og systkini. Börnin, sem greinst hafa með krabbamein, geta öðlast sjálfstæða félagsaðild við 18 ára aldur.
5. gr.
Aðalfundur félagsins skal að jafnaði haldinn fyrir febrúarlok ár hvert. Til fundarins skal boðað bréflega, með tölvupósti eða á annan sannanlegan hátt með viku fyrirvara.
Á aðalfundi skulu eftirtalin málefni tekin fyrir:
- Kosning fundarstjóra og fundarritara.
- Skýrsla stjórnar um starfsemi liðins starfsárs.
- Endurskoðaðir reikningar félagsins lagðir fram til samþykktar.
- Lagabreytingar, sbr. 11. grein.
- Kjör formanns til eins árs.
- Kjör fjögurra manna í stjórn til tveggja ára.
- Kjör löggilts endurskoðanda reikninga félagsins til eins árs.
- Ákvörðun um félagsgjald.
- Önnur mál.
Atkvæðisrétt á aðalfundi hafa skuldlausir félagsmenn sem náð hafa 18 ára aldri.
6. gr.
Stjórn félagsins er skipuð 9 mönnum, kosnum á aðalfundi skv. 5. gr., formanni til eins árs auk 8 meðstjórnarmanna, sem kosnir eru til tveggja ára þannig að 4 eru kjörnir á hverju ári. Kjörgengir til stjórnarstarfa eru félagsmenn Barna með krabbamein - styrktarsjóðs (skv 4. gr.) sem náð hafa 18 ára aldri.
Að minnsta kosti helmingur stjórnar skal skipaður foreldrum barna, sem eru eða hafa verið með krabbamein.
Stjórnin, sem fer með málefni félagsins milli aðalfunda, skiptir að öðru leyti með sér verkum.
Stjórnin getur boðað til félagsfunda til ákvörðunar um einstök mikilvæg málefni.
7. gr.
Stjórnarfundi skal boða á tryggilegan hátt með þriggja daga fyrirvara, sé þess kostur. Hann er ályktunarhæfur ef helmingur stjórnarmanna er mættur.
Afl atkvæða ræður á stjórnarfundum en séu atkvæði jöfn skal atkvæði formanns ráða.
Skylt er formanni að boða til stjórnarfunda, komi um það tillaga frá tveimur stjórnarmönnum. Gerðir stjórnarinnar skulu bókfærðar.
8. gr.
Stjórn Barna með krabbamein - styrktarfélags getur stofnað framkvæmdanefndir til að sinna ákveðnum málum eða málaflokkum í þágu félagsmanna. Hlutverk, starfssvið og umboð framkvæmdanefnda skal skilgreint og samþykkt af stjórn félagsins. Að jafnaði skal einn stjórnarmanna eiga sæti í slíkri framkvæmdanefnd, vera formaður hennar og tengiliður við stjórn , ella velur framkvæmdanefnd sér formann sem þá skal jafnframt vera tengiliður við stjórn Barna með krabbamein - styrktarfélags.
9. gr.
Félagsgjöld skulu ákveðin á aðalfundi fyrir næsta starfsár. Stjórn Barna með krabbamein - styrktarfélags er heimilt að fella niður félagsgjöld foreldra barna í meðferð í tvö ár og skulu þeir fá tilkynningu þar um. Réttindi viðkomandi skerðast þó ekki.
Félagsmaður er álitinn hafa sagt sig úr félaginu greiði hann ekki félagsgjöld í tvö ár í röð.
10. gr.
Ákvörðun um félagsslit má einungis taka á aðalfundi. Verði tillaga um félagsslit samþykkt skal þegar í stað boðað til nýs félagsfundar sem haldinn skal a.m.k. tveimur vikum síðar en ekki meira en sex vikum síðar. Fái tillaga um félagsslit 2/3 hluta atkvæða á báðum fundum öðlast hún gildi.
11. gr.
Lögum þessum verður aðeins breytt á aðalfundi og þarf samþykki 2/3 hluta fundarmanna til að lagabreytingar teljist gildar. Tillögur til lagabreytinga má einungis taka til afgreiðslu á aðalfundi að þær hafi komið fram í aðalfundarboði. Tillögum til lagabreytinga skal skilað til stjórnar Barna með krabbamein - styrktarfélags eigi síðar en 10 dögum fyrir aðalfund. Sami skilafrestur gildir um framboð eða tilnefningar í stjórnarstöður.