Styrktarsýning á Stríðsyfirlýsingu á miðvikudaginn í Háskólabíói 

Öll innkoma rennur óskipt til Styrktarfélags krabbameinssjúkra barna

Græna ljósið efnir til sérstakrar styrktarsýningar á kvikmyndinni Stríðsyfirlýsing og renna allar tekjur af sýningunni óskiptar til Styrktarfélags Krabbameinssjúkra barna.

Kvikmyndin heitir á frummálinu La guerre est déclarée eða Decleration of War og er byggð á sönnum atburðum. Ungt par verður ástfangið, flytur inn saman og eignast sitt fyrsta barn. Lífið blasir við þeim en fljótlega fara þau að gruna að ekki sé allt með felldu og innan skamms er þeirra versti ótti staðfestur; sonur þeirr er alvarlega veikur. Við fylgjumst með þeim berjast fyrir syni sínum í mörg ár og þrátt fyrir ólýsanlegt álag gefast þau aldrei upp.

Það sem gerir þessa kvikmynd svo einstæða er að það eru foreldrarnir sjálfir sem gera myndina; móðirin leikstýrir og leikur aðahlutverkið á móti föðurnum og saman skrifa þau handritið. Afraksturinn er mynd sem hreyfir verulega við manni og lætur engan ósnortinn.

- Styrktarsýningin fer fram í Háskólabíói miðvikudaginn 25. janúar kl. 18 í Sal 1.
- Miðsalan er hafin hér á Miði.is.
- Miðaverð er 1.500 krónur og 300 miðar eru í boði.

Myndin er svo frumsýnd á Franskri kvikmyndahátíð sem hefst 27. janúar í Háskólabíói.

Að hátíðinni standa að venju Græna ljósið og Háskólabíó, Institut français, Alliance française í Reykjavík ásamt sendiráðum Frakklands og Kanada.