Framkvæmdir við nýtt hvíldarheimili SKB, Hetjulund, ganga vel og er nú unnið hörðum höndum við að slá upp fyrir veggjum og steypa þá upp.  Einn veggur hefur þegar verið steyptur þar sem "hryggjarsúla" hússins hefur nú risið.  Myndir hafa verið settar hér inn.  Áfram verður fylgst með framvindu verksins hér á heimasíðu SKB.

Hringferðinni "Hjólað til heilla" lauk í dag þegar þeir félagar, Haraldur Hreggviðsson og Haraldur Helgason luku ferð sinni í kringum Ísland, annar á reiðhjóli og hinn á "aðstoðarmannabifreið".  Það voru í kringum 60 manns sem tóku á móti þeim félögum og var boðið upp á veglegar veitingar.  Rósa Guðbjartsdóttir formaður SKB þakkaði þeim félögum, sem og Lionsklúbbi Njarðvíkur, fyrir sitt frábæra framlag til krabbameinssjúkra barna og færði þeim veglega blómvendi í þakklætisskyni.  Myndirnar hér að neðan voru teknar í dag og verða þær ásamt fleirum settar inn á myndasíðuna hér á heimasíðu SKB eftir helgina.

Eins og vonandi allir vita er hringferðinni "Hjólað til heilla" að ljúka á morgun, laugardaginn 21. ágúst.  Stefnt er að því að vera við Olís-stöðina í Mosfellsbæ kl. 14.00 á morgun og eru allir sem áhuga hafa á góðum hjólreiðatúr hvattir til að slást í hópinn.  Á myndinni hér að neðan er leiðarlýsing eftir að inn í Reykjavík kemur og getur fólk slegist í hópinn hvar sem er á leiðinni.  Stefnt er að því að koma að skrifstofu SKB í Hlíðasmára 14 kl. 15.00 þar sem boðið verður upp á léttar kaffiveitingar.

Nú er „Hjólað til heilla“ að ljúka og stefna þeir félagar, Haraldur og Haraldur, á að koma í bæinn á laugardag í kringum 15.00.  Við hjá SKB ásamt félögum þeirra úr Lionsklúbbi Njarðvíkur ætlum að sjálfsögðu að taka vel á móti þeim, m.a. með því að hjóla með þeim síðasta spölinn.  Stefnan er að vera við Olís-stöðina í Mosfellsbæ kl. 14.00 á laugardag og eru allir sem vettlingi geta valdið hvattir til að slást þar í hópinn.  Þeir sem treysta sér ekki til að hjóla úr Mosfellsbænum í Hlíðasmárann geta komið í hópinn hvar sem er á leiðinni – allt eftir því hvað hverjum hentar.  Endanleg leiðarlýsing verður kynnt hér á heimasíðunni um leið og hún verður ljós.

Hópurinn mun síðan koma að skrifstofu SKB í Hlíðasmára 14 upp úr kl. 15.00 og verður boðið upp á léttar kaffiveitingar við komuna.  Öllum er velkomið að kíkja til okkar í Hlíðasmárann á laugardaginn til að fagna árangri þessara góðu manna sem hafa sýnt okkur svo mikinn stuðning síðastliðna daga.

Tímasetningar geta að sjálfsögðu breyst þegar nær dregur og verða þær breytingar þá kynntar hér á heimasíðu SKB.

Haraldur Hreggviðsson hjólakappi úr Njarðvík er nú í hringferð sinni "hjólað til heilla" og hefur ferðinni miðað vel.  Í gærkveldi náðu Haraldur ásamt aðstoðarmanni sínum Haraldi Helgasyni til Mývatns eftir erfiðasta kafla ferðarinnar frá Egilsstöðum.  Stefnan er tekin á Akureyri í dag en markmiðið er að ljúka hringnum á laugardag við skrifstofu SKB í Hlíðasmára 14.  Hægt er að fylgjast með þeim félögum á facebook-síðunni þeirra.

Settar hafa verið myndir úr ferðinni hér inn á heimasíðu SKB.

Hægt er að styrkja átakið með því að hringja í síma  901-5010 og dragast þá 1000 krónur af símareikningnum en einnig er hægt að leggja inn frjáls framlög á reikn: 1109-05-412828, kt. 440269-6489

Haraldur Hreggviðsson hjólreiðakappi úr Njarðvík lagði af stað í morgun frá skrifstofu SKB að viðstöddum góðum hópi fólks.  Með honum í för er félagi hans úr Lionsklúbbi Njarðvíkur, Haraldur Helgason.  Annar félagi þeirra, Víglundur Sverrisson, hjólaði með Haraldi fyrsta spölinn eða til Selfoss. 

Undir kvöld komu þeir Hallarnir svo að Skógum þar sem þeir dvelja í góðu yfirlæti í nótt á Hótel Eddu.

Hægt er að styrkja verkefnið með því að leggja inn á reikning 1109-05-412828 kt. 440269-6489 eða hringja í síma 901-5010 og færast þá 1000 krónur inn á áheitareikninginn.

Hægt er að fylgjast með átakinu á Facebooksíðu þeirra félaga sem ber einfaldlega heitið "Hjólað til heilla"